Në kuadër të projektit "Shkollat pa Vape – Siguria në Shkolla", organizata Education Empowerment Initiative (EEI) ka mbajtur një sesion informues në SHFMU "Elena Gjika" në Prishtinë, me pjesëmarrjen e mësimdhënësve dhe komunitetit të shkollës. Ky takim shërbeu si platformë për të ndarë informacione të rëndësishme mbi projektin, rastet shqetësuese të përdorimit të vape-ve në shkollat e Kosovës dhe trendet globale lidhur me këtë fenomen.

Gjatë diskutimit:

U prezantuan të dhëna të fundit nga hulumtimi ynë, që tregojnë rritjen e rasteve të përdorimit të vape-ve në shkolla fillore në Kosovë.

U shkëmbyen përvoja dhe u theksua nevoja për një qasje të përbashkët ndërmjet shkollës, prindërve dhe institucioneve për të parandaluar përhapjen e këtij fenomeni.

Theks i veçantë iu dha rëndësisë së rolit të mësimdhënësve dhe komunitetit në edukimin dhe mbrojtjen e fëmijëve.

Ky aktivitet thekson rëndësinë e bashkëpunimit të qëndrueshëm dhe gjithëpërfshirës për të krijuar një ambient të sigurt dhe të shëndetshëm për të gjithë nxënësit.

Aktiviteti u realizua në kuadër të programit të Fondacionit Kosovar për Shoqëri Civile (KCSF) ‘EJA Kosovë’, KCSF bashkëfinancuar nga Agjencia Zvicerane për Zhvillim dhe Bashkëpunim (SDC) dhe Suedia.

Falënderojmë SHFMU "Elena Gjika" për mikpritjen dhe të gjithë pjesëmarrësit për angazhimin dhe bashkëpunimin e tyre të vlefshëm në këtë përpjekje të përbashkët.